الى عروستي الحلوة البطلة 

هالسنة غير كل السنين ، قطعت عكل الناس كانها نهاية العالم ، بس هالسنة مكنت عارف انو رح تسرق مني شريكة حياتي ، خطيبتي يلي كان مفروض تكون مرتي صرلا ٧ شهور و اجلنا لسنة الجاي بي ٦/٦/٢٠٢١، مكنت عارف انو رح تسرق مني اغلى شي بملكو بهالدني ، سحر يلي كانت خطيبتي وامي واختي و رفيقتي وسندي و ضحكتي وسعادتي بالحياة ، مكنت عارف انو هالسنة رح تحرمني حقق حلمي انا و سحر ، حلمنا صغير كتير كان ، حلمنا كان سقف بيت يقوينا سوا و فستان ابيض شوف جمالها في هي فايتي في من باب الكنيسة ، كنت خاف واعتل هم بس بدا تفوت سحر بالفستان ما اتأثر وابكي من فرحي ،قامت هالسنة بكتني دم وحزن وحتى هيدي دمة الفرح سرقتها مني ، مكنت عارف انو هالسنة رح تخلص بس ٤ آب ويوقف الزمن الساعة ٦:٠٧ دقايق .

هالسنة العيد قديش حلو برمزيتوا ،ميلاد يسوع ،قديش حلو و قديش صعب وقاسي ، صعب وقاسي كتير وقت كنا نبلش تحضير للعيد من قبل بشهر بزينة شجرة الميلاد و زينة البيت و الهدايا لاهلي و اهلك ، روح انا و اختك ماريا حتى نقيلك هديتك و انت تروحي مع اختي جيسي تنقيلي هديتي ، ونحط الهدايا كلها تحت شجرة العيد وبليلة العيد نفتحها كلنا سوا و نغمر بعضنا ونعيّد بعضنا ، و نتشارع وين بدنا نعيّد اذا عند اهلك او عند اهلي ، كتير صعب هالعيد وقت شوفك صورة صرتي مزينة شجرة العيد بكل بيت ، صعب كتير واناني يمكن بتفكيري شوي ، بس انت ملاك ، مش بس ملاك انت قديسة صرتي حد يسوع بالسما ، وهالعيد بدل مكنا نصلي سوا ليسوع حا صليلك انت و يسوع وتزورونا بليلة العيد ، انا انسان مؤمن ، بس مكنت كتير صلّي ، انت علمتيني الصلاة و صارت واجب و فرض عليي كل يوم متل الاكل و الشرب ، عم صلّي كل يوم حتى تكوني معي و مرافقتيني بكل خطوة ، انا خسرتك بالجسد بس ، نحنا ما عنا موت ، عنا انتقال للحياة الابدية ، روحك رح تضل معي بكل ثانية وبكل تكّة وبكل خطوة ، عم بحكيكي كل يوم ما تغير شي ، بحكيكي واتساب وبحكي مع صورتك الفرق بس انو معم بسمع صوتك ولا عم تردّي عليي ،ولا عم بسمع اسمي بصوتك الحلو ، انا اكيد بكرا بتصيري تبعتيلي اشارات وانا واثق انك مش رح تتركيني وحدي يتيم بلاكي ، رح تكوني معي وحدي وعلى كتافي وين ما امشي يا ملاكي الحارس .

طموحك بالحياة كان كبير كتير ، يمكن هوي يلي خلاّني اخسرك ، شجاعتك و حبّك لبدلتك ولفوجك فوج اطفاء بيروت خلاّكي تصيري ملاك كل بيت بلبنان و بكل دول العالم ، كل لبنان وكل دول العالم صلولك و شافوكي بنت بطلة ما بتخاف من شي ، متل ما انت كان بدك ، كنتي تقوليلي نطور و شوف كيف رح خلّي كل العالم تحكي فيّي و تضربلي تحية ، صار متل ما بدك يا قلبي ، كل العالم حكيت فيكي وعن شجاعتك وعن جمالك وكل العالم ضربتلك التحية ، بس يا ريت صارت وانت حدي لان كنت شايفك وشايف حالي فيكي قد الدني و كنت اضربلك الف تحية .

رح الك شهيدة لان بدلتك و واجبك الوطني و دفاعك عن املاك وطنك فرضوا الك شهيدة ، مش بس شهيدة ، شهيدة الوطن كلّو و اول شهيدة انثى عسكرية بالجمهورية اللبنانية ، بس انت ماكان بدك تستشهدي ، انت كان بدك تعيشي لانك كلك حياة ، كان بدك نعيش سوا ، نكبر سوا ، نفرح سوا ، نتزوج سوا و نعمل عيلة سوا و نختير سوا .

وعدي الك انت صرتي تعرفي والعالم كلو صار يعرفو انو رح ضل حبك حتى ربنا ياخد امانتوا وصير حدك ، ومن هلق لا وقتها ، رح حبك بكل شخص محتاج ورح شوفك بكل طفل موجوع وبكل ختيار ما الو حدا ، قلبك و روحك يلي حبيتن لا الموت ولا غير الموت في يوقفوا لانك بنت بيلبقلا الحب،،،بيلبقلا تنحب ،،، بيلبقلا اعطيها روحي و حياتي كلاّ و اذا رجع فيي الزمن لا ورا ويا ريت بيرجع حا ارجع حبك ١٠٠٠ مرّة اكتر واكتر واكتر لو عارف حا ارجع اخسرك .

ما تعتلي هم شي هون الامانة يلي كنتي تخافي عليها بعيوني حاطتها وحتى موت وصير حدك رح تضل بعيوني ، عمو جورج و طانت نبيها و نغم وماريا... انتو بعيوني وانتو الامانة .

انت بطلة يا عروس ، بطلة كل لبنان ، وعروس بيروت الشهيدة المسعفة سحر فارس ، نيال السما فيكي و نيالك بالسما ونيالنا نحنا فيكي.
انشالله بينعاد عالجميع بالخير و الصحة والعافية و تكون ظروف احسن من هالسنة الكارسية وانشالله ما حدا بيدوق هالكاس .
شكرا