يعني بهيك بلد اسمه لبنان فيني اعرف انا كإنسان طبيعي من حقي عيش ايمتى رح يجي هالوقت؟

بقلم الدكتور علي المصري 

أنا من مواليد 1979…
أنا ابن بلد ما عرف ولا يوم شو يعني استقرار.

من عمر 0 لـ 11 سنة
خلقت بقلب الحرب الأهلية اللبنانية،
طفولتي ما كانت لعب… كانت ملاجئ وخوف.

بعمر 3 سنين
فتّحت عيوني عـ الاجتياح الإسرائيلي للبنان،
وكان الخوف أول شي تعلّمتو بهالحياة.

بعمر 4 و5 سنين
عشت حرب الجبل،
وشفت الناس كيف تهجرت بليلة وضحاها.

بعمر 6 لـ 9 سنين
كبرت وسط حرب المخيمات،
وصوت الرصاص صار جزء من يومياتي.

بعمر 10 و11 سنة
وصلت لـ حرب الإلغاء،
وكأنو الحرب رافضة تخلّيني اكبر بسلام.

بعمر 21 سنة
قلت خلص… يمكن ارتحنا،
وشفت تحرير جنوب لبنان،
وحلمت ببلد طبيعي متل باقي العالم.

بعمر 27 سنة
رجعت الحرب بـ حرب تموز،
ورجعت معها كل الوجع ودمار كبير للبنان.

بعمر 29 سنة
وبـ أحداث 7 أيار،
اكتشفت إنو الخطر الحقيقي مش دايماً من برا…
الخطر الحقيقي هو الطائفية لما تتحوّل لسلاح بين الناس.

من عمر 32 سنة وطالع
فات لبنان بمرحلة الحرب السورية وتأثيرها على لبنان،
حرب مش إلنا… بس نحنا كنا عم نعيش تداعياتها كل يوم.

بعمر 38 سنة
شهدت معركة فجر الجرود،
وواجهنا الإرهاب على حدودنا.

بعمر 41 سنة
إجا الوجع الكبير…
انفجار مرفأ بيروت،
ما كان حرب… بس دمّر بلد بكاملو.

واليوم… بعمر 45–47 سنة
عايشين حرب من نوع آخر …
الحرب على كل لبنان وعكل الشعب اللبناني 

والمنطقة والعالم على حافة حرب عالمية

يعني اليوم صار فيني قول اني خلفت عهالدني
طفل حرب…
شاب حرب…
واليوم انا رجال عايش بين حرب وحرب.
ومش عارفين اذا بيخلص العمر قبل ما تخلص الحرب او بيخلص العمر والحرب بتضل شغالة

لإيمتى الشر بده يضل مسيطر بهالدني 
وايمتى الخير رح ينتصر ويعم العالم السلام
دايماً اطماع الدول بخيرات دول تانيه بتخلي الشعب يدفع الثمن اول شي . 
ومش طبيعي بأي مكان بالعالم،
إنو شعب يقبل حدا ياخد أرضه ويسكت…
الدفاع عن الأرض حق…
بس الوجع إنو هيدا الحق دايمًا بيجي بكلفة كبيرة، خاصتاً انو مضى ٤٧ سنه وبعدنا عم ندفع الكلفة مش انا لحالي وطن بكاملة . 

بالختام رح قول جملتين بيختصروا مسيرة حياة
هل نحن نعيش حياة، أم نحن مجرد "ناجين" بمرتبة الشرف؟ وإلى متى سنظل نبني فوق رمال متحركة؟